Actos en homenaxe ao Che

O Comité Nacional Ernesto Che Guevara, do que facemos parte xunto a diversas organizacións galegas, segue a organizar actividades para divulgar o pensamento dese militante revolucionario e rendir tributo ao sue exemplo solidario e internacionalista, aos 50 anos do seu asasinato. Os días 1 e 2  de marzo, Compostela e Vigo acollerán charlas-coloquio con Carlos Tablada (Economista, escritor e pedagogo cubano. Licenciado en Filosofía, Socioloxía e Doutor en Ciencias Económicas. Autor, entre outros, dos libros “El pensamiento económico de Ernesto Che Guevara” e “El marxismo del Che”).

O día 9 terá lugar no Teatro principal de Compostela o acto nacional de homenaxe ao Che, con música, poesía e intervencións políticas.

Ver máis

Continuamos a aprender e a debater sobre actualidade e futuro de Cuba

Continuando coa xeira de actividades que desde Mar de Lumes estamos a promover para difundir a actualidade de Cuba despois dos anuncios sobre estabelecemento de conversas entre Cuba e os Estados Unidos, onte, 8 de abril, tivemos a ocasión de debater e aprender sobre a realidade do país caribeño nun novo acto co-organizado coa Liga Estudantil Galega na facultade de Ciencias Económicas e Empresariais de Compostela.

Máis de 130 persoas ocuparon unha sala preparada para unhas 80 durante o tempo que durou a exposición do Cónsul Xeral da República de Cuba en Galiza, José Antonio Solana, e máis a quenda de intervencións, preguntas e comentarios que se alongou durante aproximadamente unha hora con achegas interesantes da parte dos asistentes.

Houbo, portanto, ocasión de contextualizar adecuadamente a retomada das conversas bilaterais, lembrando o episodio da liberación dos últimos membros presos dos 5 Heroes Cubanos, e para falar da continuidade e aprofundamento do proceso revolucionario en Cuba co debate popular dos liñamentos para os vindeiros anos. Dous temas de especial interese tendo en conta como se terxiversa a información sobre o primeiro e como se oculta, directamente, o segundo na axenda dos grandes medios de comunicación.

Os próximos tempos son, para Cuba, un novo desafío e unha grande oportunidade. Así o entendemos en Mar de Lumes e é por iso que consideramos esencial continuar na liña expositiva e argumental con novas actividades no futuro.

Subscrebe a nosa axenda solidaria!

Ver máis

"Nós non lles exiximos aos EUA que muden o seu sistema social. Eles non nolo poden exixir a nós"

De esquerda a direita: Moncho Leal (Fco. Villamil), 

José Antonio Solana (Cónsul Xeral) e Pedro Cortegoso (Mar de Lumes)

Na tarde de onte, día 12 de marzo, celebramos na facultade de Belas Artes de Pontevedra unha palestra sobre a actualidade cubana da man do compañeiro Moncho Leal da Asociación de Amizade Galego Cubana Francisco Villamil e do Cónsul Xeral da República de Cuba en Galiza, José Antonio Solana.

Leal e Solana referíronse ao novo tempo político e social que se abre en Cuba após os Estados Unidos teren recoñecido a ineficacia do bloqueo para conseguir os seus intereses imperialistas e despois da histórica declaración simultánea de boa disposición a abrir diálogos que deberían levar a restabelecer as relacións diplomáticas. A ese respeito, o Cónsul Xeral lembrou que as conversas están unicamente nunha fase preliminar e que as relacións continúan bloqueadas na medida en que a Casa Branca non decretou o fin do bloqueo nen das restricións que impón desde hai cinco décadas contra a illa.

Houbo tamén ocasión de deixar claros cais son os limites que os negociadores cubanos porán nas conversas: a non inxerencia e o respeito á independencia e á soberanía de cada un dos países. Tal como declarou o Cónsul: "Nós non lles exiximos aos EUA que muden o seu sistema social. Eles non nolo poden exixir a nós".

Desde Mar de Lumes, como organización anti-imperialista e como non pode ser doutro xeito, saudamos as novas posibilidades que se abren para o desenvolvemento de Cuba, non só en relación aos Estados Unidos — sendo cientes de que alén da metodoloxía, o seu obxectivo, que é apoderarse da illa, permanece intacto —, como tamén en relación á actualización dos mecanismos económicos e sociais para continuar a afondar na vía do socialismo e da soberanía dos povos.

 

Subscrebe a nosa axenda solidaria!

Ver máis

Liberados os últimos 3 cubanos encarcerados nos EUA, a solidariedade continúa

A data de hoxe, 17 de decembro de 2014, vén de se converter nun fito fundamental para Cuba e para todas as persoas e organizacións que exercemos a solidariedade co povo cubano. Veñen de ser liberados os últimos tres dos Cinco axentes encarcerados nos Estados Unidos por revelaren información sobre ataques terroristas contra Cuba.

Antonio Guerrero Rodríguez, Gerardo Hernández Nordelo e Ramón Labañiño Salazar foron liberados no día de hoxe, uníndose así a Fernando González Llort, excarcerado en febreiro e a René González Sehwerert, liberado en maio de 2014, ambos após cumpriren até o último minuto das súas condenas. Termina desta maneira, grazas á presión solidaria e ás negociacións levadas adiante pola diplomacia cubana, un dos episodios máis descarados e vergoñentos do liñamento anticubano dos Estados Unidos.

Estes cinco cubanos tiñan sido encarcerados nos Estados Unidos en 1998, após entregaren ao FBI documentación e gravacións de conversas de diversos grupos sobre ataques á illa preparados por opositores que operaban principalmente desde Miami e outras ciudades norteamericanas, como Luis Posada Carriles, autor confeso da voadura do voo 455 que produciu a morte de 73 civís en 1976, e que nunca foi xulgado. Diante das evidencias, a resposta dos Estados Unidos foi acusar os axentes antiterroristas de espionaxe e de comprometeren a seguranza interna norteamericana. A realidade, porén, é que os Cinco nunca tiveron como misión a espionaxe, senón apenas infiltrar os grupos de opositores que desde aquel país preparaban e financiaban accións terroristas, tal e como demostraron as gravacións entregadas. Durante o xulgamento, organizacións de solidariedade coa Revolución — e tamén outras, pouco sospeitosas de seren pró-cubanas, como Amnistía Internacional — denunciaron a falta de probas que demostrasen as acusacións feitas polos EUA e o acceso limitado dos acusados aos seus avogados e á documentación, bloqueando o seu dereito á defensa. Mesmo así, o xuízo concluíu con condenas desproporcionadas, convertendo o caso dos Cinco nun exemplo icónico da actitude do imperialismo contra Cuba.

Desde Mar de Lumes - Comité Galego de Solidariedade Internacionalista, unímonos ao resto de organizacións e persoas que en Galiza exercen a solidariedade con Cuba e expresamos a nosa alegría por esta boa nova e pola nova fase de relacións bilaterais que parece vir a abrirse, ao tempo que reafirmamos aínda con maior énfase o noso compromiso con Cuba e contra o imperialismo, que alén destas liberacións continúa agredindo o povo cubano por medio dun bloqueo criminal que tamén debe ser levantado. Do mesmo modo que René González tiña asegurado sentirse preso mentres os seus compañeiros permanecesen encarcerados, nós — como parte desa corrente da solidariedade — non podemos sentirnos libres mentres Cuba non poida libertarse do bloqueo imperialista e exercer o seu goberno de forma absolutamente libre e soberana.

Viva a Revolución cubana!
Vivan os povos que loitan!

Compostela, 17 de decembro de 2014
Mar de Lumes - CGSI

Ver máis

Homenaxe xusta a Pedro Trigo, heroe galego-cubano

Onte, 28 de novembro, a Asociación de Amizade Galego Cubana Francisco Villamil e Mar de Lumes - Comité Galego de Solidariedade Internacionalista realizamos unha xornada de homenaxe nacional ao heroe galego-cubano do asalto ao cuartel Moncada onde se inicia, como ponto de partida emblemático, a Revolución Cubana.

Un momento da recepción no concello de Pontevedra |

A xornada comezou coa recepción na alcaldía de Pontevedra de Pedro Trigo, xunto co Cónsul Xeral da República de Cuba, José Antonio Solana, e parte da equipa consular, nunha reunión que serviu para comentar a historia concreta de varios participantes galegos no episodio do Moncada, así como noutras fases da Revolución, como os irmáns Ameixeiras, Frank País ou Xulio Trigo, irmán do propio Pedro Trigo, que morreu na acción.

Perto dun cento de persoas acudiron á palestra-coloquio con Pedro Trigo na Faculdade de Belas Artes |

Pola tarde, a homenaxe continuou cos actos públicos na facultade de Belas Artes de Pontevedra, cunha participación dunhas 100 persoas, a partir da actuación dos músicos Carme Penin e Mauricio Polsinelli, da proxección do documental Fuimos el inicio – Recuerdos del asalto al Moncada, e inmediatamente coa introdución do Cónsul Xeral e coa palestra e posterior coloquio arredor das experiencias de Pedro Trigo, que explicou a situación previa á Revolución — coa ditadura de Fulgencio Batista dirixida polos Estados Unidos —, a necesidade urxente de concretar unha acción revolucionaria e o modo como aquilo finalmente se verificou no asalto ao Moncada — falido militarmente, pero de grande importancia política, como se comprovou posteriormente. "No Moncada comezou de novo a loita pola independencia e soberanía de Cuba", afirmou Pedro Trigo.

A xornada terminou á noite cunha cea de confraternización con case 50 persoas, e coa entrega dun presente en nome das organizacións convocantes.

A entrega do presente das organizacións convocantes a Pedro Trigo |

Unha homenaxe para moitos e moitas máis

Homenaxear Pedro Trigo é a forma que desde Mar de Lumes, en colaboración coa AAGC Francisco Villamil, temos de homenaxear, en sentido máis amplo e abranxente, o resto de combatentes do Moncada — galegos e non galegos. Facelo pon de relevo a importancia histórica da nosa emigración, tal como destacou o Cónsul Xeral na súa intervención, e afasta de nós a idea de sermos un povo apoucado que viaxaba polo mundo á procura de fortuna, tal como tanto nos ten repetido a historiografía e o discurso político español nas escasas ocasións en que se refere á historia de Galiza.

Exemplos como os de Pedro e Xulio Trigo, e non só, afirman a idea de que os galegos e as galegas non marchaban, senón que eran expulsados do seu país por un sistema colonial que lles impedía viveren nas súas casas, e que unha vez fóra, se imbricaron fortemente nos povos que os receberon, participando intensamente nas súas sociedades de acollida, ao ponto de teren papeis destacados en episodios históricos como o do asalto ao Moncada. Pedro Trigo, fillo da emigración galega forzada, é unha evidencia viva desta conclusión.

Ver máis

Homenaxe nacional a Pedro Trigo, 28 Nov.

Pedro Trigo, un dos heroes destacados na Revolución Cubana, é un fillo da emigración galega á América. El e o seu irmán, o tamén revolucionario Xulio Trigo — que morreu durante o combate do asalto ao cuartel Moncada — abandonaron Galiza xunto coa súa nai en 1936, cando o levante fascista no Estado español comezou a producir as primeiras vítimas da represión en Galiza. Desde Cuba, a súa familia levou a cabo unha intensa actividade de apoio á República até o fin da guerra en 1939 e, a partir de 1944, con apenas dezaseis anos, Pedro Trigo participará tamén en varias loitas sindicais dentro da propia Cuba, vencelladas ao sector téxtil.

Ligado aos traballos de criazón dun partido revolucionario en Cuba, en 1951 entra en contacto con Fidel Castro e comeza a traballar na preparación organizativa dun movemento armado insurreccional co obxectivo de terminar coa ditadura de Fulgencio Batista a través da cal o imperialismo norteamericano operaba en Cuba. O 26 de xullo de 1953, tanto el como o seu irmán Xulio farán parte das columnas de 150 insurxentes que tratan de tomar sen éxito o cuartel Moncada. O asalto non tivo o éxito esperado, porque o cuartel non chegou a ser tomado polas forzas revolucionarias e durante o combate foron mortos, ou detidos e despois executados máis de cincuenta militantes, entre eles Xulio Trigo, con apenas 28 anos. Mesmo así, con Fidel e outros revolucionarios detidos, o asalto ao Moncada tornouse fundamental para a historia de Cuba, porque é naquel episodio que se orixina a loita guerrilleira que protagonizará a historia do país nos seguintes meses.

Pedro Trigo terá nesa conformación un papel destacado. Dirixente dunha das células do Movemento 26 de Xullo, a policía de Batista chega a detelo en varias ocasións, polo que pasa á clandestinidade e acaba exiliándose uns meses en Galiza, de onde regresa en 1958. O 31 de decembro daquel ano, coa ditadura derrotada militar e politicamente, Fulgencio Batista abandona Cuba polo avanzo da guerrilla, que entra na Habana o 1 de xaneiro de 1959 liderada por Fidel Castro.

Desde o triunfo da Revolución, Pedro Trigo participará en varios cargos de responsabilidade do goberno revolucionario. Foi xefe nacional de compras de Cubana de Aviación, Director de relacións internacionais do Instituto de Aeronáutica Civil de Cuba, Vicedirector de relacións internacionais do Ministerio da Minaría, e posteriormente, membro do corpo diplomático. Segundo secretario da embaixada cubana en Praga, primeiro secretario da embaixada no Estado español e finalmente cónsul xeral de Cuba en Bulgaria, Pedro Trigo ten recebido as condecoracións máis significativas da República de Cuba, ademais de ter traballado lado a lado con algúns dos protagonistas fundamentais da Revolución, de Fidel ou Raúl a Vilma, de Abel a Melba, de Haydee ao Che.

Unha homenaxe nacional

Mar de Lumes, como organización solidaria con Cuba, organiza xunto coa Asociación de Amizade Galego Cubana Francisco Villamil unha homenaxe a Pedro Trigo o día 28 de novembro, coa seguinte axenda:

• 18h00: Proxección do documentario Fuimos el inicio - Memoria del asalto al Moncada
• 19h30: Palestra a cargo do revolucionario Pedro Trigo, con intervención do Cónsul de Cuba, José Antonio Solana.
• 22h00: Cea-Homenaxe na Adega dos Avós.

As actividades da tarde celebraranse na Facultade de Belas Artes de Pontevedra, desde a que nos trasladaremos para a cea-homenaxe posteriormente. Para acudir á cea, é necesario reservar praza, enviando un correo electrónico a mardelumes@gmail.com, indicando o nome das persoas que queren asistir.

Ver máis

A Cuba revolucionaria continúa a cumprir anos

A Cuba revolucionaria continúa a cumprir anos. Os 88 que hoxe, 13 de agosto, cumpre Fidel Castro, o seu principal ideólogo e artífice. Ademais, cumpren tamén anos nestes días tres dos catro presos cubanos que aínda continúan retidos nos Estados Unidos após a saída de René González coa pena cumprida.

Para celebrar a data, a Asociación de Amizade Galego-Cubana Francisco Villamil e o Comité Galego de Solidariedade Internacionalista Mar de Lumes realizamos unha fotografía simbólica conxunta para a enviarmos á campaña internacional Free The Five e animamos a todas as persoas solidarias a que envíen as súas felicitacións a info@freethefive.org, onde llas farán chegar aos presos e a Fidel.

Ver máis

26 de xullo: 61 anos de Cuba digna!

Cada 26 de xullo, o internacionalismo solidario celebra por todo o mundo o Día da Rebeldía en conmemoración da tomada revolucionaria do cuartel Moncada en Cuba, que deu orixe á revolución liderada por Fidel Castro contra o goberno títere dos Estados Unidos na illa.

En Galiza, polo especial vencello que temos coa illa, mais sobre todo polo firme convencemento de que Cuba debe poder vivir en paz e sen a continua inxerencia externa dos imperialismo, tamén se celebrou a data cunha festa organizada polos compañeiros e compañeiras da Asociación de Amizade Galego-Cubana Francisco Villamil. A festa, que durou varias horas, contou coa discurso da cónsul da República de Cuba en Compostela, Laura Urra, quen agradeceu os actos solidarios e repasou os principais desafíos de Cuba, do bloqueo criminal norteamericano ao caso dos Cinco. Seguidamente tivemos o pracer e a honra de escoitar a Pedro Trigo, fillo de galegos de Viveiro, que participou directamente no asalto, onde morreu seu irmán Julio logo de ser apresado e torturado. Aos seus 86 anos debullou o contexto da Cuba deses anos e os pormenores dos asaltos ao Cuartel Moncada e Carlos Manuel de Céspedes e a importancia destes feitos no trunfo posterior da revolución.

Desde Mar de Lumes - Comité Galego de Solidariedade Internacionalista non podemos facer outra cousa que parabenizar a Asociación Francisco Villamil pola súa iniciativa e chamar, como sempre, a extender a solidariedade internacionalista do pobo galego co de Cuba, alén das intoxicacións informativas que interesan ás oligarquías pró-imperio.

Ver máis

Celebrado coloquio sobre o sistema educativo cubano

Onte, nunha xornada organizada pola Liga Estudantil Galega e na que Mar de Lumes colaboramos xunto coa Asociación de Amizade Galego-Cubana Francisco Villamil e a A.C. A Revira, puidemos escoitar o Cónsul Xeral de Cuba, José Antonio Solana, falando sobre o sistema educativo cubano diante dun auditorio de máis de 70 persoas congregadas nas aulas da Faculdade de Belas Artes da UVigo.

O Cónsul explicou a estrutura do sistema formativo e outros aspectos técnicos, ademais de explicar o enorme esforzo do goberno revolucionario para reducir a taxa de analfabetismo (Cuba foi o primeiro país da América do Sul a se declarar territorio libre de analfabetismo), para estender a educación ás zonas máis remotas da illa cun corpo de mestres voluntarios, ou para expandir o sistema universitario non só por toda a illa, como tamén con especial atención aos colectivos máis desfavorecidos, incluída a poboación carceraria, que pode reintegrarse á vida comunitaria cunha carreira universitaria. Inclusive, foron referidos datos de informes da varias organizacións internacionais, vinculadas á ONU, que sistematicamente teñen recoñecido a altísima calidade do sistema educativo en Cuba. Unha das ouvintes mesmo manifestou: "a miña avoa era analfabeta, a miña nai foi alfabetizadora, eu son xornalista".

José Antonio Solana falou tamén de como o ensino en Cuba se convertiu nun dos focos de máxima atención do goberno e inclusive fixo autocrítica a respeito da imposibilidade de manter un país onde todas as persoas posúan titulación universitaria, na medida en que son necesarios tamén traballadores e traballadoras cualificadas para atender os oficios produtivos. Unha autocrítica que, segundo explicou, é asumida polo goberno da República de Cuba, que xa ten implementado planos destinados a favorecer o ingreso de novos estudantes en ciclos formativos similares á Formación Profesional do sistema educativo galego.

A preguntas do público, que se extenderon por máis de unha hora, tamén se falou das dificuldades que algúns países poñen á convalidación de títulos universitarios obtidos en Cuba, sobre as misións científicas da illa en diversas partes do mundo, notadamente América Latina e África e sobre como o bloqueo económico que os Estados Unidos mantén ano após ano condiciona os aspectos materiais, non só no educativo, como no resto das tarefas diarias.

Ver máis

Apresentada en Compostela Cubainformacion.tv

Na tarde de onte, 30 de setembro, foi apresentado en Compostela o portal informativo Cubainformación.tv nun acto celebrado na Facultade de Xornalismo da Universidade de Santiago de Compostela, organizado pola Liga Estudantil Galega e por Mar de Lumes — Comité Galego de Solidariedade Internacionalista.

A apresentación foi realizada por Luisa Cuevas, correspondente e colaboradora do medio e militante internacionalista, que explicou con varios exemplos a política comunicativa do mundo capitalista a respeito de Cuba, baseada na magnificación dos problemas e no silencio absoluto a respeito dos avanzos da Revolución, así como a práctica de utilizar sempre fontes antigobernamentais.

A trintena de asistentes, entre os que tamén se encontraba o cónsul xeral de Cuba, José Antonio Solana, puideron coñecer de primeira man a orixe do proxecto, a súa filosofía comunicativa e a función social que cumpre unha web que, na actualidade, serve como un dos principais pólos aglutinadores da diáspora cubana.

Ademais, Luisa Cuevas explicou a importancia dos medios de comunicación no caso cubano, debido ao bloqueo mediático tamén imposto polos Estados Unidos e os seus aliados e á presenza doutros medios publicados por opositores e financiados por multitude de institucións e organizacións anticubanas, como o famoso Nuevo Herald.

Houbo tempo tamén para un breve coloquio onde as asistentes se interesaron pola situación dos medios de comunicación en Cuba e sobre as acusacións de dogmatismo vertidas contra o goberno popular, o que permitiu departir brevemente sobre a existencia dunha nutrida rede de blogueiros cubanos que vai moito alén da publicitada Yoani Sánchez, tamén financiada polos Estados Unidos e outros lobbies anticubanos.

Ver máis

Liberdade para os cinco patriotas cubanos

Antonio Guerrero Rodríguez, Fernando González Llort, Gerardo Hernández Nordelo e Ramón Labaniño Salazar son catro cidadáns cubanos que levan presos nos Estados Unidos desde 2001. Un quinto, René González Sehwerert, agora en Cuba, foi recentemente liberado nunha conmuta técnica que, porén, o levou a declarar sentirse aínda preso, mentres os seus compañeiros continúen retidos en cárceres norteamericanos.

Os cinco, Antonio, Fernando, Gerardo, Ramón e René, foron acusados de espionaxe polos Estados Unidos e condenados a penas que van dos 15 anos de prisión a dúas cadeas perpetuas, nun xuízo político que organizacións como Amnistía Internacional teñen criticado por diversos problemas de procedemento.

Na realidade, os cinco membros do servizo de intelixencia cubano estaban nos Estados Unidos infiltrados en grupúsculos anti-cubanos similares aos que tiñan organizado os ataques terroristas contra hoteis na Habana e contra un avión de pasaxeiros de Cubana de Aviación, en 1976, co resultado 73 vítimas mortais. O seu obxectivo era desvendar novos planos de ataques contra a illa e pór en coñecemento das autoridades norteamericanas a información destes grupos, á cabeza dos cales se encontra aínda hoxe Luis Posada Carriles, autor confeso do atentado ao avión, e que continúa libre.

Os Estados Unidos, coñecedores da información partillada pola Dirección de Intelixencia cubana non só non actuaron contra os grupos revelados polos cinco funcionarios cubanos, senón que centraron os seus esforzos en localizar a orixe da información e orquestrar un xuízo farsa co obxectivo de encarcerar os cinco funcionarios cubanos.

Desde aquel xuízo, gobernos, institucións e organizacións internacionais e millóns de persoas por todo o mundo organizan cada ano por estas datas concentracións e mobilizacións contra a decisión de manter encarcerados os cinco heroes cubanos, mentres terroristas confesos receben homenaxes públicas de parte de organizacións privadas e administracións públicas norteamericanas.

Na recepción no concello de Pontevedra, o Cónsul de Cuba,
o alcalde da cidade e membros da Francisco Villamil e
de Mar de Lumes

Con este mesmo motivo, a Asociación de Amizade Galego Cubana Francisco Villamil promoveu unha recepción do Consulado de Cuba co Alcaldía de Pontevedra e organiza mañá sábado 14 de setembro unha concentración pública na praza da Peregrina desa cidade, que contará coa presenza do cónsul de Cuba en Galiza, José Antonio Solana, para exixir, xunto con outros pobos do mundo, a liberación dos catro funcionarios cubanos que aínda continúan presos, e a abertura, por parte dos Estados Unidos, de investigacións que leven á detención de Luis Posada Carriles e dos seus colaboradores.

Mar de Lumes — Comité Galego de Solidariedade Internacionalista, como organización colaboradora, fai extensivo o chamamento a participar nesta concentración, co convencemento de que só a presión popular pode revelar a crueldade e o dobre raseiro do goberno norteamericano e do seu interese por desestabilizar o goberno lexítimo de Cuba, por calquera medio que for.

Liberdade para os Cinco patriotas cubanos!
14 de setembro, 12h00

Praza da Peregrina, Pontevedra

Ver máis

USA pide investigar a morte de Oswaldo Payá

O xornal español El Mundo vén de pór en marcha mais unha campaña contra Cuba por medio dunha entrevista co coñecido delincuente e dirixente do Partido Popular Ángel Carromero. Polo seu interese e polos seus argumentos, que evidentemente subscribimos, difundimos o comunicado da Asociación de Amizade Galego-Cubana Francisco Villamil, facendo extensiva, mais unha vez, a nosa solidariedade co povo de Cuba e co seu proceso revolucionario. Eis o comunicado: 

UNHA CONGRESISTA AMIGA DO TERRORISTA ORLANDO  BOSCH PIDE INVESTIGAR A MORTE DE OSWALDO PAYÁ

O 5 de agosto, nas páxinas de El Mundo, Ángel Carromero, dirixente do PP de Madrid, acusa os servizos secretos cubanos da morte dos opositores Oswaldo Payá e Harold Cepero. Carromero, condenado en Cuba a 4 anos de prisión por “homicidio imprudente” no accidente no que morreron ditos opositores, afirma agora que ese accidente foi causado por “un vehículo azul que nos embestiu.”

El Mundo informara en 2012 da retirada do carné a Carromero despois de acumular 42 multas en tres anos. Está claro, pois, que é un condutor perigoso. Ademais, en anteriores declaracións ao Washington Post, Carromero afirmara que o vehículo agresor era “vermello”, non “azul”. Finalmente, no coche, ademais dos falecidos, viaxaban o sueco Aron Modig e o propio Carromero. Os dous, testemuñas do suposto ataque, son repatriados con rapidez aos seus países, algo inverosímil cando se pretende ocultar un delito.

O 7 de agosto, El Mundo publica que a congresista cubanoamericana Ileana Ros-Lehtinen “pide investigar a morte de Oswaldo Payá”. O xornal afirma que Ileana, “nacida na Habana e veterana do Partido Republicano, organizou varios encontros con José M. Aznar”. Pero, ¿que outras amizades ten Ileana Ros?

Na imaxe, a congresista con Orlando Bosch. Na parte superior, unha dedicatoria manuscrita: “Orlando, con mucho cariño. Ileana Ros-Lehtinen.”

Quen é Orlando Bosch? 

O xornal barcelonés La Vanguardia publica o 6 de outubro de 2006 esta noticia. “Cúmprense 30 anos do atentado contra un avión cubano no que morreron 73 persoas. O Departamento de Xustiza de EE UU decidía onte o futuro do terrorista cubano Posada Carriles, exaxente da CIA, un dos presuntos autores. O home que admite ser o planificador do atentado, o cubano exiliado Orlando Bosch, vive en liberdade en EE UU, tras recibir permiso para residir directamente do presidente George Bush pai. Lonxe de arrepentirse, Bosch insiste en que o avión (no que viaxaba o equipo de esgrima cubano e un grupo de estudantes de Güiana) era "un branco de guerra" e que os pasaxeiros eran cómplices de Castro. En Miami, Posada e Bosch son heroes.”

Apoia Ileana Ros-Lehtinen a Luis Posada Carriles?

En www.cubadebate.cu, pódese ver en vídeo unha homenaxe a Posada en Miami. No minuto 7, o presentador afirma que Ileana Ros é presidenta honoraria dun comité de apoio económico ao terrorista.

O 8 de agosto, El Mundo publica que “EE UU esixe que se investigue o caso Payá”. En EE UU, vive en liberdade Posada Carriles. A súa detención foi solicitada por varios lexisladores demócratas (La Vanguardia, 10.05.07), que o consideran “un dos asasinos máis notorios do hemisferio occidental”. A súa extradición a Venezuela foi reclamada polo Cumio Iberoamericano de Xefes de Estado celebrado en Salamanca en 2005. 

Para a súa inverosímil campaña contra Cuba, Carromero e El Mundo contan con grandes axudas: Ileana Ros-Lehtinen e o goberno de EE UU; ambos os dous, como pode comprobarse, destacados defensores dos dereitos humanos. 

ASOCIACIÓN DE AMIZADE GALEGO-CUBANA FRANCISCO VILLAMIL

Ver máis