Mar de Lumes perante o aniversario da matanza de Odesa

Mar de Lumes chama a denunciar o papel colaboracionista do imperialismo representado nos Estados Unidos de América e a Unión Europea e á practica da solidariedade internacionalista co pobo agredido pola Xunta golpista de Kiev.

Perante o primeiro aniversario da matanza de Odesa protagonizada por militantes neonazis na Casa dos Sindicatos e que levou por diante a vida de 47 persoas deixando 214 feridos o 2 de maio de 2014, Mar de Lumes quer enviar un saúdo fraterno e solidario a familiares, amigos e militantes antifascistas desta rexión.

Após un ano do golpe de estado coñecido como “Maidán” Ucraína é gobernada por unha Xunta criminal amparada e financiada polas potencias occidentais. Un ano no cal os novos axentes do Poder — singularmente Pravi Sektor e Svoboda — fixeron uso das forzas armadas e de batallóns paramilitares de corte nazista acosando a poboación que se manifestou contra o golpe de Estado e contra a imposición de leis que favorecen a entrada da Ucraína na Unión Europea e na NATO.

Desde Mar de Lumes queremos lembrar as vítimas da matanza de Odesa, decenas de persoas que foron agredidas, torturadas e queimadas por centos de ultras neonazis na Casa dos Sindicatos daquela cidade. Uns neonazis que a día de hoxe continuan sen ser xulgados. Tamén queremos lembrar as máis de 5000 persoas asasinadas desde que o goberno fascista de Kiev iniciou a súa intervención armada no leste do país baixo a hipócrita denominación “Operación ATO” ou “Operación Antiterrorista”, promovida polo imperialismo e cun obxectivo claro: impedir, por calquera medio, a independencia das rexións insurxentes do Donbass e liquidar a poboación descendente de rusas e rusos que é maioritaria na zona.

Por último, Mar de Lumes chama a denunciar o papel colaboracionista do imperialismo representado nos Estados Unidos de América e a Unión Europea e á practica da solidariedade internacionalista co pobo agredido pola Xunta golpista de Kiev.

— Galiza, 2 de maio de 2015.

Subscrebe a nosa axenda solidaria!

Ver máis

Nova concentración solidaria coa Ucraína antifascista

Mentres en Minsk, Rusia e a OSCE acordaban onte, 19 de setembro, unha retirada das tropas das fronteiras de Donetsk e Lugansk, desde Mar de Lumes - Comité Galego de Solidariedade Internacionalista, coa colaboración da Liga Estudantil Galega, chamamos diversos colectivos sociais, políticos e sindicais a unha concentración en denuncia das agresións fascistas contra a autoproclamada Novorossia como parte dun ataque maior, de carácter imperialista, centrado sobre Rusia e co pano de fondo do fin da unipolaridade do mundo.

A concentración, como acto final das xornadas de solidariedade co Donbass organizadas en Vigo, que incluían tamén unha palestra na libraría Andel da cidade, reuniu unhas cen persoas e colectivos baixo o lema central "Solidariedade Internacionalista coa Ucraína Antifascista" e palabras de orde como "Imperialismo fora da Ucraína", "Non son pro-rusos, son antifascistas" ou "Unión Europea, unión imperialista".

• Acceso á galería de GzFoto. 
• Acceso á galería de Ilkerman. 

Ver máis

Comezaron as xornadas antifascistas de Vigo

Na tarde de onte, 16 de setembro, comezaron na Libraría Andel as xornadas antifascistas organizadas por Mar de Lumes e pola Liga Estudantil Galega, co primeiro dos actos, consistente nunha palestra onde se falou da situación na Ucraína desde a súa xénese no Maidan ás derivacións que está a ter neste momento, cando todas as evidencias apontan a que o conflito – malia concentrar a súa fase bélica na Ucraína e Novorossia – vai moito alén destes territorios e pode atinxir xa un plano global.

De fondo, opera a necesidade do imperialismo occidental, cos Estados Unidos á cabeza, de impedir a reaparición de Rusia como axente de primeiro nível no plano xeopolítico e de protexer os seus intereses expansivos na Europa do Leste, cos sucesivos alargamentos da Unión Europea.

O coloquio posterior, con interesantes intervencións dalgunhas das 70 persoas que acudiron ao acto, enriqueceu a reflexión con outras liñas de análise interesantes como os picos da enerxía, a presenza do capitalismo ultraespeculativo e a súa relación coas guerras e mesmo a análise das consecuencias que as sancións da UE á Rusia e da Rusia á UE poden ter para povos como o galego.

O seguinte acto das xornadas será a concentración antifascista organizada en solidariedade co Donbass, que se realizará en Vigo o día 19, diante da porta do MARCO.

Ver máis

Chamamento de Novorossia aos pobos da Europa

Hoxe a Ucraína é soamente un campo de entrenamento militar para o renacemento do fascismo mundial. Ao tempo, a poboación do Sureste sofre unha invasión militar que supón o masacre diario da súa poboación nunha operación baixo o paraugas dos EUA, da UE e da OTAN. Fronte o ocultamento mediático e a pasividade xeralizada, o pobo da Novorussia fai un chamado urxente á solidariedade dos diferentes pobos da Europa para que os crimes de guerra que se están a perpetrar contra eles non fiquen impunes e se poña fin á agresión. | Traducida e subtitulada por Mar de Lumes.

+ Ver outros vídeos de Mar de Lumes

Nota: pola dureza das imaxes, é posíbel que precises estar conectado ao youtube ou unha conta google para ver o video debido ás restricións de idade

Ver máis

Non ao fascismo na Ucraína! Non pasarán!

Foto de GzFoto - Ver a galería completa

Na Ucraína están a ser violados todos os limites da lóxica política após unha revolución que non era tal, a mudanza dun goberno pola forza, unha persecución sádica e criminal de calquera opositor e das minorías, e o uso de calquera medio — incluído os bombardeamentos con fósforo branco sobre poboación civil — para castigar as novas repúblicas populares que se teñen formado como única maneira de sobrevivir ao avanzo do fascismo. E todo financiado, xa ninguén o nega, pola UE e polos Estados Unidos.

O último episodio, vivido onte mesmo, 27 de xuño de 2014, marca o punto de non retorno na deriva criminal da UE: porque onte, após meses de violencia neonazi, Durão Barroso e van Rompuy asinaban con Petro Poroshenko — o actual presidente títere na Ucraína — un acordo de libre comercio preferente que, en pouco tempo, pode terminar introducindo o país eslavo na UE. O imperialismo dá, desta maneira, máis un paso: xa non derruba gobernos lonxe de sí, senón que pasa xa á fase de os integrar nas súas estruturas oligárquicas centrais.

Contra esta evolución, contra os crimes fascistas na Ucraína e contra a agresión ininterrompida ás Repúblicas Populares de Donetsk e Lugansk, desde Mar de Lumes organizamos unha xornada antifascista que tiña como obxectivo non só visibilizar a situación, senón tamén explicala e, en todo caso, enviar a nosa solidariedade desde a Galiza para quen sofre a persecución deste novo surto fascista e paramilitar. Militantes antifascistas e antiimperialistas e simpatizantes denunciamos en Pontevedra esta situación cunha concentración pública, realizamos un xantar de confraternidade en Moaña e asistimos a unha palestra sobre a situación actual, as súas orixes e as súas derivadas no complexo taboleiro da xeoestratexia nesa parte do mundo. A conclusión á que chegamos non podía ser outra:

Non ao fascismo na Ucraína!
Non pasarán!


»» Ver a galería de GzFoto sobre a concentración antifascista de Pontevedra

Ver máis

Solidariedade internacionalista coa Ucraína antifascista!

Máis unha vez, como hai 70 anos, o fascismo volta percorrer a Europa. A criminal xunta que goberna hoxe a Ucraína, promovida e amparada polos monopolios europeos e norteamericanos, leva a cabo no leste do país unha campaña de limpeza étnica e ideolóxica, bombardeando a populación con fósforo branco e míseis causando a morte de centos de homes, mulleres e nenos.

Arseniy Yatsenyuk, primeiro ministro da Xunta fascista que goberna en Kiev

Desde o golpe de estado de febreiro, o goberno títere de Kiev desatou unha feroz campaña represiva contra milleiros de persoas, contando coa participación dun novo actor, a extrema dereita. Proba desta nova unión entre fascismo e capital é a colaboración conxunta das Forzas Armadas coas milicias da Garda Nacional representada polas organizacións “Praviy Sektor” e “Svoboda”. O masacre de Odessa ou a dura represión en cidades como Kharkov e Slaviansk fainos voltar a ollar atrás na historia, rememorando os tristes acontecementos acaecidos no rexime hitleriano.

Desde a nosa organización queremos destacar o papel xogado polo imperialismo nos movementos surxidos da praza Maidán, actuando neles claros intereses económicos e xeoestratéxicos que levaron  o fascismo e o nazismo a posicións hexemónicas. Após estas pretendas revoltas populares e democráticas vese o longo brazo da alianza EUA-UE que, para tentar tirar a Ucraína da influencia rusa, non dubida en armar e financiar o nazifascismo, en apoialo mediaticamente ou en se aliar con el.

Mar de Lumes — Comité Galego de Solidariedade Internacionalista fai un chamamento a clase traballadora a exercer a máis ampla solidariedade co antifascismo ucraniano. A loita contra a besta fascista implica combater en todos os seus aspectos o capitalismo e as alianzas imperialistas que o promoven e sosteñen.

Non son pro-rusos, son antifascistas!
Galiza-Ucraína solidariedade!
Non pasarán!

Este 28 de xuño, participa connosco na Xornada Antifascista e Internacionalista!

Ver máis