Así se falou da actualidade e do futuro inmediato da Catalunya en Compostela, na Coruña e en Ourense

Esta semana, Albert Botran (membro do Secretariado da CUP e deputado do parlamento catalán na anterior lexislatura) estivo en Galiza para explicar a actualidade do proceso político en marcha no seu país. O obxectivo non era outro que partillar reflexións e análises da situación ás que doutro modo sería case imposíbel acceder desde fóra de Catalunya, visto o comportamento dos grandes medios de comunicación, máis preocupados en ocultar os debates e facer todo xirar á volta da legalidade e de falsos argumentarios que en informar.

Acto na Fac. de Políticas da USC, no serán do día 28 de Febreiro.

Esta terceira visita de Botran a Galiza en dous anos — a cuarta se contamos coa súa presenza nos actos do Día da Patria de 2017 — prodúcese nun momento en que o Estado está a radicalizar a súa aposta pola baza da represión, e no que, de maneira consecuente con isto, se está a tornar cada vez máis difícil dar un debate a serio sobre os motivos para optar pola independencia. Uns motivos que, como lembrou o propio Botran, son principalmente de tipo instrumental, a diferenza do que trasladan os medios españois, que insisten en presentar o conflito como dun caráter unicamente identitario e egoísta.

Nesta ocasión, as xornadas desenvolvéronse na Facultade de Políticas de Compostela, na de Socioloxía da Coruña e no Centro Social A Galleira de Ourense, e congregaron máis de cento e cincuenta persoas interesadas en ultrapasar ese bloqueo informativo e en participar, como sempre nos actos organizados por Mar de Lumes, através de preguntas, reflexións e críticas persoais que enriqueceron as ideas apontadas polo convidado.

Encontro universitario na Fac. de Socioloxía da UdC, na mañá do día 1 de Marzo.

Botran defendeu a fortaleza do movemento independentista, verdadeiro motor do proceso, que vai moito alén das organizacións partidarias e que se ten tornado un auténtico movemento de masas que aínda medra cada vez que hai espazo para debater. En consecuencia, insistiu tambén na reivindicación política dos pasos dados até o de agora, pondo en valor a declaración consecuente de Mireia Boya no Tribunal Supremo e as posibilidades de confrontar o discurso do Estado coa saída de Anna Gabriel para o exilio. Por último, reivindicou o papel feito pola solidariedade internacionalista, vehiculada no noso país através da Plataforma Galiza con Catalunya, deixando á marxe o papel dunha esquerda española incapaz, salvo pequenas excepcións, de se situar fronte ao bloque monárquico e do 155.

Esta visita enmárcase dentro do intenso programa de actividades que desde Mar de Lumes vimos realizando nos últimos anos en solidariedade co pobo catalán e en apoio ao exercicio do seu dereito de libre determinación.

Acto no C. S. A Galleira de Ourense na tarde do día 1 de Marzo. 

Subscrebe a nosa axenda solidaria!

Ver máis

Así foron as palestras sobre os procesos emancipatorios catalán e basco fronte ao desafío unionista español

Dentro da liña de traballo de apoio aos procesos de emancipación nacional dos pobos sen Estado que Mar de Lumes está a desenvolver com organización de solidariedade internacionalista, desta volta trouxemos a Galiza dous vultos destacados de Euskal Herria e dos Países Cataláns para falar dos procesos soberanistas destes pobos fronte ao desafío do unionismo español. 

Albert Botran, deputado da CUP no Parlament de Catalunya e Niko Moreno, militante da esquerda abertzale e membro da área internacional de Sortu estiveron connosco en dous concorridos actos, celebrados o día 7 de xuño en Vigo e o 8 en Compostela. Neles, partillaron ideas, experiencias e análises sobre a situación de subalternidade que enfrentan os pobos dentro do Estado español e sobre a única saída posíbel: a ruptura democrática. 

En concreto, Albert Botran falou da rápida evolución da opción independentista no seu país en relación á cada vez máis clara imposición forzada do proxecto unionista estatal e puxo en perspectiva os pasos dados pola sociedade catalá até tornar maioritaria a posición favorábel a exercer o dereito a decidir. 

Niko Moreno, pola súa vez, explicou a aposta do paso da estratexia político-militar á vía exclusivamente política e contrapuxo este avanzo coas reticencias encontradas do outro lado da mesa, especialmente no caso do Estado español. Ademais, caracterizou o papel do PNB na actualidade como principal traba contra unha vía basca á independencia e como punta de lanza do proxecto unionista tamén en Cataluña. 

Botran e Moreno tiveron tamén ocasión para referirse ás contradicións de ambos os procesos e ao papel xogado pola "nova" esquerda española, que formalmente apoia a celebración de referendos, pero que no día a día se confirma como unha rémora que xoga, ao mesmo tempo, cos chamados á convivencia e coa indefinición calculada do seu propio proxecto político. 

Estas xornadas remataron en Compostela o día 8, xusto na véspera de que, tal como previsto, o governo catalán anunciase a data e contido do referendo que celebrará, a pesar de toda a oposición do aparato do Estado, o día 1 de outubro coa pregunta: Quere que Cataluña sexa nun estado independente en forma de república? — un anuncio que desde Mar de Lumes recibimos con entusiasmo. 

Subscrebe a nosa axenda solidaria!

Ver máis

Dous meses despois, Kobanê resiste!

A pesar da intensa choiva, máis de 60 persoas concentráronse onte, 12 de novembro en Vigo, convocadas por Mar de Lumes para se solidarizar co povo curdo, cando se cumpren dous meses do continuo ataque que está a sofrer na cidade rojavana de Kobanê.

Alén de darse leitura a un comunicado de apoio onde se lembrou que a situación de guerra e caos nesa área do Oriente atopa as súas causas principais na acción do Imperialismo occidental, que alimentou as forzas do ISIS, entoáronse diversas palabras de orde como "Galiza-Curdistán, solidariedade", "Erdogan, cómplice da Otan", "Kobanê resiste, Curdistán libre", "Imperialismo, fóra da Siria" ou "Estado islamista, axente imperialista". Tamén se amosaron diversos cartaces con referencias á resistencia en Kobane, á liberdade para o dirixente do PKK preso por Turquía, Abdullah Öcalan e bandeiras do KCK e do PKK. Aínda, agradeceuse a asistencia e apoio das 15 organizacións e colectivos aderentes.

Viva o Curdistán libre!

* Fotos de Ilkerman Iker.

Ver máis

Galiza con Catalunya, pola independencia

Como cada 11 de setembro, en diversas partes do mundo celébrase a Diada de Catalunya, o dia nacional catalán, en lembranza da queda de Barcelona e a abolición da Generalitat após meses de asedio durante a guerra que en 1714 enfrentaba as dinastías dos Borbóns e dos Austrias polo control da coroa española. A vitoria dos Borbóns deu paso a unha vaga uniformizadora e recentralizadora que está no cerne da cuestión catalá e do actual procés, negado sistematicamente polo actual Estado español, cuxa descentralización administrativa após a ditadura franquista non oculta nen por acaso un centralismo político que produce dependencia e nega os dereitos colectivos dos pobos, entre eles o de autodeterminación. Contra isto, hoxe en Catalunya centos de milleiros de persoas saíron á rúa a conformar un V xigante (V de votar e de vitoria) contra a negación da vontade colectiva, nun auténtico record histórico de mobilización.

Para acompañar esta imparábel demostración popular, para conmemorar a Diada de 2014 e tamén para expresar o apoio de centos de galegas e galegos á consulta democrática prevista para o 9 de novembro — e que España se nega a aceptar —, desde a Plataforma Galiza con Catalunya, da que Mar de Lumes fai parte xunto con outras organizacións sociais galegas, organizamos unha acción de solidariedade cun V simbólico formado por perto de 500 persoas e coa leitura do manifesto Galiza con Catalunya. Pola democracia e o dereito a decidir, que continúa a colleitar apoios individuais e colectivos a través da internet.

A constitución da Plataforma Galiza con Catalunya representa unha oportunidade para mostrar a implicación do pobo galego co proceso de soberanía catalán — e tamén escocés —, polo que isto podería supor para outros pobos que hoxe fan parte do Estado español.

Desde Mar de Lumes, como organización que non só defende o dereito á autodeterminación, como tamén a transformación radical da sociedade por medio do derrubamento do capitalismo, consideramos que en Catalunya, como en Galiza e noutros países sen Estado, calquera mudanza social de raíz pasa necesariamente por romper o marco de dependencia que impide tomar decisións soberanas en función dos intereses do pobo. Porque non se pode defender o dereito a un Estado propio no caso de Palestina, Curdistán ou o Saara e non para Catalunya, Euskal Herria e Galiza.

» Vídeo de GzVideos.

Ver máis