Novo xuízo contra independentistas bascos

Hoxe, 22 de setembro, 28 mozos independentistas bascos serán xulgados acusados de pertencer a Segi, organización xuvenil da Esquerda Abertzale ilegalizada polo Estado español, a partir de informacións obtidas baixo tortura e cando hai pouco tempo outros 40 mozos e mozas foron absoltos polo mesmo tribunal de excepción — A Audiencia Nacional — acusados do mesmo "delito". O obxectivo real, pois, non é deter e encarcerar perigosos delincuentes, senón travar e contribuir a paralisar a posibilidade de que en Euskal Herria continúe a se consolidar o novo escenario de paz. En resumo, un novo ataque ao feito de facer política desde a base e unha nova provocación dos inimigos da paz, que desde Mar de Lumes - Comité Galego de Solidariedade Internacionalista non podemos deixar pasar sen máis. A continuación, o manifesto Aske Eguna, e un vídeo onde dous dos mozos explican a situación e as torturas ás que teñen sido sometidos:

MANIFESTO ASKE EGUNA

Máis unha vez, atopámonos diante dunha grave situación. A Audiencia Nacional española vai xulgar 28 mozos bascos pola súa militancia política baseándose en declaracións realizadas baixo tortura. A acusación é unha pena de seis anos de cárcere. É intolerábel que nunha pretendida democracia casos como este continúen a se repetir. Estamos fartas de tanto sofrimento. É hora de desobedecer estas leis inxustas.

Este xuízo non fai sentido, nen política nen xudicialmente, en Euskal Herria. É inxusto. O pasado curso, o mesmo tribunal de excepción absolveu outros 40 mozos bascos baixo a mesma acusación. Por que agora teima de novo, contra as súas mesmas decisións? Até cando?

Non somos inxenuas e sabemos que a solución está nas nosas mans. Sabemos que o povo, un gran muro popular, é o único que pode acabar con este pesadelo dunha vez por todas.

Que propomos?

Nos últimos anos, teñen sido incontábeis as veces que expresamos o noso desexo de dar unha saída democrática ao conflito político de Euskal Herria. Os xuízos políticos baseados en leis inxustas están totalmente fóra desta lóxica. Queren acabar, sexa como fro, coas esperanzas de paz deste povo. Nós fixemos unha aposta clara por unha solución democrática e non vamos ficar de brazos cruzados. E eles sábeno.

Temos que acabar cos xuízos políticos. Eis o obxectivo.

Temos aprendido de cada iniciativa realizada contra os xuízos políticos. Día a día, somos máis as que queremos deixar atrás estas situacións sen sentido. Día a día somos máis as que queremos formar un muro popular máis forte. Cada día seralles máis complicado deternos e xulgarnos, porque cada día llo poremos máis e máis difícil.

1. Algunhas de nós iremos a Madrid a denunciar esta farsa de xuízo, e moitas teremos que toparnos de novo cos nosos torturadores e escoitar as súas mentiras. Como se pode definir como xusta unha sociedade que permite estas situacións?

2. Outras non iremos a Madrid. Non nos moveremos de aquí, do noso povo, e non participaremos en xuízo ningún. Queremos expresar cos nosos actos a apremiante necesidade de resolver este problema estrutural. Aínda sabendo que nos deterán por ficarmos en Euskal Herria, esta é a achega que facemos ao proceso de resolución do conflito. De novo é a hora do muro popular, e necesitaremos a axuda de todas vós.

Só grazas á achega persoal de cada unha de vós atinxiremos unha solución xusta. Cada cal na súa medida, toda colaboración será benvida para deter os ataques deste sistema corrupto dunha vez por todas.

Estamos na hora de unirmos forzas, de nos apoiarmos unhas noutras. Estamos na hora de respondermos como povo e temos unha ocasión para o facer. Aquí e agora. Unámonos diante da inxustiza!

A vitoria será do povo ou non será. Irabaziko dugu!

Euskal Herria, setembro do 2014.

Ver máis

Liberdade para Alfon!

En 2012, no marco da greve xeral estatal de 14 de novembro, Alfonso Fernández Ortega, “Alfon” — un mozo de 21 anos na altura — foi detido en Madrid cando se dirixía ao punto de encontro para unirse a un piquete informativo. Trasladado inmediatamente aos calabozos da Brigada de Información, foi sometido a varios interrogatorios extraxudiciais levados a cabo por policías encapuzados que intercalaron as preguntas con ameazas á súa integridade, á súa familia e ao seu círculo de amizades, que fan parte dos grupos que en Vallekas e outros bairros obreiros de Madrid se organizan após anos de desmobilización promovida polos sindicatos do sistema, CCOO e UGT.

Alfon está acusado de levar unha bolsa con explosivos preparados para detonar no momento da súa detención, aínda que el sempre o negou. Con efeito, non hai constancia provada da súa relación coa bolsa que a policía di terlle incautado con gasolina, botes de gás e cinco cravos. As súas pegadas dixitais nen sequera foron encontradas naqueles obxectos. Aínda máis, o seu avogado, Erlantz Ibarrondo, ten suxerido que a detención de Alfon se enmarque, na realidade, nunha operación maior contra os Bukaneros (grupo antifascista de siareiros do Rayo Vallecano) e outras organizacións de esquerda, cuxo local foi rexistrado inmediatamente despois da detención de Alfon.

Porén, as contradicións da policía postas de manifesto nas vistas realizadas e a súa incapacidade para encontrar provas da inculpación de Alfon non foron suficientes para que o sistema represivo o deixase libre. Antes ao contrario, Alfon foi sometido ao rexime FIES — un rexime especial de detención que permite interceptar todas as comunicacións e practicar todo tipo de hostigamentos e restricións severas, e que ten sido denunicado en repetidas ocasións por multitude de organizacións internacionais. Un rexime que mesmo ten facultado a policía a entrar en domicilios e sedes de organizacións polo simple feito de teren escrito cartas de apoio ao detido, ou para restrinxir o acceso do detido a literatura ou música considerada “política”.

En apenas uns días, dous anos máis tarde duns feitos no mínimo escuros e en absoluto provados, Alfon enfrenta o xuízo que determinará se cumpre unha pena de prisión de 4 a 8 anos ou se é posto definitivamente en liberdade.

Como organización solidaria e internacionalista, desde Mar de Lumes só podemos aderir á campaña internacional de apoio a Alfon e denunciar o intento de criar un chivo expiatorio con este mozo fillo da súa clase e con iso frear unha posíbel revitalización da loita obreira. Os ataques deste tipo nunca se producen por acaso, nen son alleos ás dinámicas de loita. E iso tamén o sabemos en Galiza, coa persecución contra Carlos e Serafín ou contra Tamara e Ana, por citar apenas os exemplos máis recentes. Casos como estes evidencian a corrupción intrínseca ao sistema capitalista e, ao mesmo tempo, tamén a do Estado español como ferramenta coa que ese sistema é aplicado.

Ver máis

Galiza con Canarias. Non ás prospeccións de petróleo!

Máis unha vez Canarias volta sufrir as garras do imperio colonial. O goberno español quere usar esta nación africana para compracer os intereses da oligarquía nun novo intento de maximizar os beneficios económicos ás costas do pobo.

A falla de soberanía e a dependencia do estado imperialista convértea nun peón estratéxico para transnacionais e gobernos capitalistas. Perante isto animamos a clase traballadora canaria a continuar saíndo ás rúas, tomar parte activa dos movementos populares e non agardar ningunha resposta institucional.

Canarias é unha nación rica en recursos naturais para poder desenvolver enerxías renovables sen necesidade de danar bruscamente o medio ambiente e polo tanto non depender dun recurso limitado e contaminante como é o petróleo. Acadar a soberanía política e económica ­polo tanto enerxética­ é un dos obxectivos que temos que alcanzar as nacións colonizadas para por freo ós intentos de destrución e exquilmación do noso medio ambiente.

Desde o Comité de Solidariedade Internacionalista Mar de Lumes queremos denunciar os intentos de extraccións de petróleo das costas canarias. Consideramos que gobernantes e empresas non tiveron en conta en ningún momento a opinión do pobo.

Defendemos un modelo enerxético limpo e sostíbel, respectuoso ca flora e ca fauna e que non hipoteque a todo un pobo. Por experiencia sabemos que estes grandes megaproxectos non deixarán cartos nin emprego, ao contrario, destrución e fin dun modo de vida tradicional en consonancia co medio ambiente.

Reivindicamos como organización soberanista e antiimperialista o dereito dos canarios e canarias a decidir sobre o que lles afecta, a defender con dignidade os intereses do pobo e confrontarse contra as aspiracións coloniais de gobernos e multinacionais. Non podemos facer outra cousa que sumarnos as reivindicacións da clase traballadora canaria, apoiar aos movementos populares e animar a construír país desde abaixo e a esquerda.

Desde Galiza enviamos un saúdo fraternal e internacionalista,

Non ás prospeccións petrolíferas!
Boicot a Repsol!
Canarias libre e socialista!

— MAR DE LUMES

Comité Galego de Solidariedade Internacionalista

Ver máis